Во и́мя
Отца́, и Сы́на,
и Свята́го
Ду́ха. Ами́нь.
Го́споди
Іису́се
Христе́, Сы́не
Бо́жій, моли́твъ
ра́ди Пречи́стыя
Твоея́ Ма́тере,
преподо́бныхъ
и Богоно́сныхъ
оте́цъ на́шихъ
и всѣ́хъ
святы́хъ,
поми́луй
насъ. Ами́нь.
Сла́ва
Тебѣ́, Бо́же
нашъ, сла́ва
Тебѣ́.
Царю́
Небе́сный,
Утѣ́шителю,
Ду́ше и́стины,
Иже вездѣ́
сый и вся́
исполня́яй,
Сокро́вище
благи́хъ и
жи́зни Пода́телю,
пріиди́ и
всели́ся въ
ны, и очи́сти
ны отъ вся́кія
скве́рны, и
спаси́, Бла́же,
ду́шы на́шя.
Святы́й
Бо́же, Святы́й
Крѣ́пкій,
Святы́й
Безсме́ртный,
поми́луй
насъ (трижды).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Пресвята́я
Тро́ице,
поми́луй
насъ; Го́споди,
очи́сти
грѣхи́ на́шя;
Влады́ко,
прости́
беззако́нія
на́ша; Святы́й,
посѣти́ и
исцѣли́ не́мощи
на́шя, и́мене
Твоего́ ра́ди.
Го́споди,
поми́луй (трижды).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Отче
нашъ, Иже
еси́ на
небесѣ́хъ!
Да святи́тся
и́мя Твое́,
да пріи́детъ
Ца́рствіе
Твое́, да бу́детъ
во́ля Твоя́,
я́ко на
небеси́ и на
земли́.
Хлѣбъ нашъ
насу́щный
даждь намъ
днесь; и
оста́ви
намъ до́лги
на́шя, я́коже
и мы оставля́емъ
должнико́мъ
на́шымъ; и не
введи́ насъ
во искуше́ніе,
но изба́ви
насъ отъ
лука́ваго.
Тропари:
Поми́луй
насъ, Го́споди,
поми́луй
насъ: вся́каго
бо отвѣ́та
недоумѣ́юще,
сію́ Ти моли́тву
я́ко
Влады́цѣ
грѣ́шніи
прино́симъ:
поми́луй
насъ.
Сла́ва
Отцу́ и Сы́ну
и Свято́му
Ду́ху:
Го́споди,
поми́луй
насъ, на Тя
бо упова́хомъ,
не прогнѣ́вайся
на ны зѣло́,
нижé помяни́
беззако́ній
на́шихъ: но
при́зри и ны́нѣ
я́ко
благоутро́бенъ,
и изба́ви ны
отъ врагъ на́шихъ.
Ты бо еси́
Богъ нашъ, и
мы лю́діе
Твои́, вси
дѣлá рукý
Твое́ю, и и́мя
Твое́
призыва́емъ.
И ны́нѣ
и при́сно и
во вѣ́ки
вѣко́въ. Ами́нь.
Милосе́рдія
две́ри отве́рзи
намъ,
Благослове́нная
Богоро́дице,
надѣ́ющіися
на Тя да не
поги́бнемъ,
но да изба́вимся
Тобо́ю отъ
бѣдъ: Ты бо
еси́ спасе́ніе
ро́да
христіа́нскаго.
Го́споди,
поми́луй
(12).
Молитва
1-я, св.
Макарія
Великаго:
Бо́же
вѣ́чный, и
Царю́ вся́каго
созда́нія,
сподо́бивый
мя да́же въ
часъ сей
доспѣ́ти:
прости́ ми
грѣхи́, я́же
сотвори́хъ
въ сей день,
дѣ́ломъ, сло́вомъ
и помышле́ніемъ:
и очи́сти, Го́споди,
смире́нную
мою́ ду́шу
отъ вся́кія
скве́рны
пло́ти и ду́ха,
и да́ждь ми,
Го́споди, въ
но́щи сей
сонъ прейти́
въ ми́рѣ: да
воста́въ
отъ смире́ннаго
ми ло́жа,
благоугожду́
пресвято́му
и́мени
Твоему́ во
вся дни
живота́
моего́, и
поперу́
борю́щія мя
враги́ пло́тскія
и безпло́тныя.
И изба́ви мя,
Го́споди,
отъ помышле́ній
су́етныхъ,
оскверня́ющихъ
мя, и пóхотей
лука́выхъ: я́ко
Твое́ есть
ца́рство, и
си́ла и сла́ва,
Отца́ и Сы́на
и Свята́го
Ду́ха, ны́нѣ
и при́сно, и
во вѣ́ки
вѣко́въ. Ами́нь.
Молитва
2-я, св.
Антіоха:
Вседержи́телю
Сло́во
Отчее, Самъ
соверше́нъ
сый Іису́се
Христе́, мно́гаго
ра́ди
милосе́рдія
Твоего́,
никогда́же
отлуча́йся
мене́ раба́
Твоего́, но
всегда́ во
мнѣ почива́й.
Іису́се, до́брый
па́стырю
Твои́хъ ове́цъ,
не преда́ждь
мене́
крамолѣ́
зміи́нѣ, и
жела́нію
сатани́ну
не оста́ви
мене́, я́ко
сѣ́мя тли во
мнѣ есть. Ты
у́бо, Го́споди
Бо́же
покланя́емый,
Царю́ Святы́й,
Іису́се
Христе́, спя́ща
мя сохрани́
немерца́ющимъ
свѣ́томъ, Ду́хомъ
Твои́мъ
Святы́мъ,
Имже освяти́лъ
еси́ Твоя́
ученики́.
Даждь, Го́споди,
и мнѣ,
недосто́йному
рабу́
Твоему́,
спасе́ніе
Твое́ на ло́жи
мое́мъ:
просвѣти́
умъ мой свѣ́томъ
ра́зума
свята́го
ева́нгелія
Твоего́, ду́шу
любо́вію
креста́
Твоего́, се́рдце
чисто́тою
словесе
Твоего, тѣ́ло
мое́ Твое́ю
стра́стію
безстра́стною,
мысль мою́
Твои́мъ
смире́ніемъ
сохрани́, и
воздви́гни
мя во вре́мя
подо́бно на
Твое́
славосло́віе.
Яко
препросла́вленъ
еси́ со
безнача́льнымъ
Твои́мъ
Отце́мъ и съ
Пресвяты́мъ
Ду́хомъ во
вѣ́ки. Аминь.
Молитва
3-я, Святому
Духу:
Го́споди,
Царю́ Небе́сный,
Утѣ́шителю,
Дýше и́стины,
умилосе́рдися,
и поми́луй
мя грѣ́шнаго
раба́
Твоего́, и
отпусти́ ми
недосто́йному,
и прости́
вся, ели́ка
Ти согрѣши́хъ
днесь я́ко
человѣ́къ,
па́че же и не
я́ко человѣ́къ,
но и горѣ́е
скота́, во́льныя
моя́ грѣхи́
и нево́льныя,
вѣ́домыя и
невѣ́домыя:
я́же отъ ю́ности
и отъ нау́ки
злы: и я́же
суть отъ на́гльства
и уны́нія.
Аще и́менемъ
Твои́мъ кля́хся,
или́ поху́лихъ
é въ помышле́ніи
мое́мъ, или́
кого́ укори́хъ,
или́
оклевета́хъ
кого́ гнѣ́вомъ
мои́мъ, или́
опеча́лихъ,
или́ о чемъ
прогнѣ́вахся,
или́ солга́хъ,
или́ безго́дно
спахъ, или́
нищь пріи́де
ко мнѣ, и
презрѣ́хъ
его́, или́
бра́та
моего́
опеча́лихъ,
или́ сва́дихъ,
или́ кого́
осуди́хъ,
или́
развелича́хся,
или́
разгордѣ́хся,
или́ разгнѣ́вахся,
или́ стоя́щу
ми на моли́твѣ,
умъ мой о
лука́вствіи
мíра сего́
подви́жеся,
или́
развраще́ніе
помы́слихъ,
или́ объядо́хся,
или́ опи́хся,
или́ безъ
ума́ смѣя́хся,
или́ лука́вое
помы́слихъ,
или́ добрóту
чужду́ю ви́дѣвъ,
и тóю уя́звенъ
быхъ се́рдцемъ,
или́ неподо́бная
глаго́лахъ,
или́ грѣху́
бра́та
моего́
посмѣя́хся:
моя́ же суть
безчи́сленная
согрѣше́нія,
или́ о моли́твѣ
неради́хъ,
или́ и́но
что содѣ́явъ
лука́вое, не
помню́: та бо
вся и бо́льша
сихъ содѣ́яхъ.
Поми́луй мя,
Тво́рче мой,
Влады́ко,
уны́лаго и
недосто́йнаго
раба́
Твоего́, и
оста́ви ми, и
отпусти́, и
прости́ мя, я́ко
благъ и
человѣколю́бецъ:
да съ ми́ромъ
ля́гу, усну́
и почíю, блу́дный,
грѣ́шный и
окая́нный
азъ, и
поклоню́ся,
и воспою́, и
просла́влю
пречестно́е
и́мя Твое́,
со Отце́мъ, и
единоро́днымъ
Его́ Сы́номъ,
ны́нѣ и при́сно
и во вѣ́ки.
Ами́нь.
Молитва
4-я, св.
Макарія
Великаго:
Чтó Ти
принесу́?
или́ чтó Ти
возда́мъ,
великодарови́тый
безсме́ртный
Царю́, ще́дре
и
человѣколю́бче
Го́споди?
Яко лѣня́щася
мене́ на
Твое́
угожде́ніе,
и ничто́же
бла́го
сотво́рша,
приве́лъ
еси́ на коне́цъ
мимоше́дшаго
дне сего́,
обраще́ніе
и спасе́ніе
души́ мое́й
стрóя. Ми́лостивъ
ми бу́ди грѣ́шному,
и обнаже́нному
вся́каго дѣ́ла
бла́га,
возста́ви
па́дшую мою́
ду́шу,
оскверни́вшуюся
въ безмѣ́рныхъ
согрѣше́ніихъ,
и отъими́
отъ мене́
весь по́мыслъ
лука́вый ви́димаго
сего́ житія́,
прости́ моя́
согрѣше́нія,
еди́не
Безгрѣ́шне,
я́же Ти
согрѣши́хъ
въ сей день,
вѣ́дѣніемъ
и невѣ́дѣніемъ,
сло́вомъ, и
дѣ́ломъ, и
помышле́ніемъ,
и всѣ́ми мои́ми
чу́вствы. Ты
Самъ
покрыва́я,
сохрани́ мя
отъ вся́каго
сопроти́внаго
обстоя́нія,
Боже́ственною
Твое́ю вла́стію
и неизрече́ннымъ
человѣколю́біемъ
и си́лою. Очи́сти,
Бо́же, очи́сти
мно́жество
грѣхо́въ
мои́хъ,
благоволи́,
Го́споди,
изба́вити
мя отъ сѣ́ти
лука́ваго, и
спаси́ стра́стную
мою́ ду́шу, и
осѣни́ мя
свѣ́томъ
лица́
Твоего́,
егда́ пріи́деши
во сла́вѣ, и
неосужде́нна
ны́нѣ сномъ
усну́ти
сотвори́, и
безъ мечта́нія,
и несмуще́нъ
по́мыслъ
раба́
Твоего́
соблюди́, и
всю
сатанину́
дѣ́тель
отжени́ отъ
мене́, и
просвѣти́
ми разу́мныя
о́чи серде́чныя,
да не усну́
въ смерть. И
посли́ ми
Ангела ми́рна,
храни́теля
и наста́вника
души́ и тѣ́лу
моему́, да
изба́витъ
мя отъ врагъ
мои́хъ: да
воста́въ со
одра́ моего́,
принесу́ Ти
благода́рственныя
мольбы́. Ей,
Го́споди,
услы́ши мя
грѣ́шнаго и
убо́гаго
раба́
Твоего́́,
изволе́ніемъ
и со́вѣстію:
да́руй ми
воста́вшу
словесе́мъ
Твои́мъ
поучи́тися,
и уны́ніе
бѣсо́вское
да́лече отъ
мене́ отгна́но
бы́ти
сотвори́
Твои́ми
Ангелы: да
благословлю́
и́мя Твое́
свято́е, и
просла́влю,
и сла́влю
Пречи́стую
Богоро́дицу
Марíю, Юже
далъ еси́
намъ грѣ́шнымъ
заступле́ніе,
и пріими́
Сію́, моля́щуюся
за ны. Вѣмъ
бо, я́ко
подража́етъ
Твое́
человѣколю́біе,
и моля́щися
не престаéтъ.
Тоя́
заступле́ніемъ,
и честна́го
креста́ зна́меніемъ,
и всѣхъ
святы́хъ
Твои́хъ ра́ди,
убо́гую ду́шу
мою́
соблюди́,
Іису́се
Христе́, Бо́же
нашъ: я́ко
святъ еси́, и
препросла́вленъ
во вѣ́ки. Ами́нь.
Молитва
5-я:
Го́споди
Бо́же нашъ, е́же
согрѣши́хъ
во дни семъ
сло́вомъ, дѣ́ломъ
и помышле́ніемъ,
я́ко благъ и
человѣколю́бецъ
прости́ ми:
ми́ренъ
сонъ и
безмяте́женъ
да́руй ми,
Ангела
Твоего́
храни́теля
посли́,
покрыва́юща
и соблюда́юща
мя отъ вся́каго
зла. Яко Ты
еси́ храни́тель
душа́мъ и
тѣлесе́мъ
на́шымъ, и
Тебѣ́ сла́ву
возсыла́емъ,
Отцу́, и Сыну́,
и Свято́му
Ду́ху, ны́нѣ
и при́сно, и
во вѣ́ки
вѣко́въ. Ами́нь.
Молитва
6-я:
Го́споди
Бо́же нашъ,
въ Него́же
вѣ́ровахомъ,
и Его́же и́мя
па́че вся́каго
и́мене
призыва́емъ,
даждь намъ
ко сну
отходя́щимъ
осла́бу
души́ и тѣ́лу,
и соблюди́
насъ отъ вся́каго
мечта́нія, и
те́мныя сла́сти
кромѣ́: уста́ви
стремле́ніе
страсте́й,
угаси́
разжже́нія
воста́нія
тѣле́снаго:
даждь намъ
цѣлому́дреннѣ
пожи́ти, дѣ́лы
и словесы́:
да добродѣ́тельное
жи́телство
воспріе́млюще,
обѣтова́нныхъ
не отпаде́мъ
благи́хъ
Твои́хъ, я́ко
благослове́нъ
еси́ во вѣ́ки.
Ами́нь.
Молитва
7-я, св.
Іоанна
Златоуста,
по числу
часовъ дня и
нощи:
Го́споди,
не лиши́
мене́ небе́сныхъ
Твои́хъ
благъ. Го́споди,
изба́ви мя
вѣ́чныхъ
мукъ. Го́споди,
умо́мъ ли
или́
помышле́ніемъ,
сло́вомъ
или́ дѣ́ломъ
согрѣши́хъ,
прости́ мя.
Го́споди,
изба́ви мя
вся́каго
невѣ́дѣнія
и забве́нія,
и малоду́шія
и окамене́ннаго
нечу́вствія.
Го́споди,
изба́ви мя
отъ вся́каго
искуше́нія.
Го́споди,
просвѣти́
мое́ се́рдце,
е́же
помрачи́
лука́вое
похотѣ́ніе.
Го́споди,
азъ я́ко
человѣ́къ
согрѣши́хъ,
Ты же я́ко
Богъ щедръ
поми́луй мя,
ви́дя не́мощь
души́ моея́.
Го́споди,
посли́
благода́ть
Твою́ въ по́мощь
мнѣ, да
просла́влю
и́мя Твое́
свято́е. Го́споди
Іису́се
Христе́,
напиши́ мя
раба́
Твоего́ въ
кни́зѣ живо́тнѣй,
и да́руй ми
коне́цъ
благíй. Го́споди
Бо́же мой, а́ще
и ничто́же
бла́го
сотвори́хъ
предъ Тобо́ю:
по даждь ми
по благода́ти
Твое́й
положи́ти
нача́ло
благо́е. Го́споди,
окропи́ въ
се́рдцѣ мое́мъ
ро́су
благода́ти
Твоея́. Го́споди
небесе́ и
земли́,
помяни́ мя
грѣ́шнаго
раба́
Твоего́, сту́днаго
и нечи́стаго,
во Ца́рствіи
Твое́мъ. Ами́нь.
Го́споди,
въ покая́ніи
пріими́ мя.
Го́споди, не
оста́ви
мене́. Го́споди,
не введи́
мене́ въ
напа́сть. Го́споди,
даждь ми
мысль бла́гу.
Го́споди,
даждь ми сле́зы,
и па́мять
сме́ртную, и
умиле́ніе.
Го́споди,
даждь ми по́мыслъ
исповѣ́данія
грѣхо́въ
мои́хъ. Го́споди,
даждь ми
смире́ніе,
цѣлому́дріе
и послуша́ніе.
Го́споди,
даждь ми
терпѣ́ніе,
великоду́шіе
и кро́тость.
Го́споди,
всели́ въ мя
ко́рень
благи́хъ,
страхъ Твой
въ се́рдце
мое́. Го́споди,
сподо́би мя
люби́ти Тя
отъ всея́
души́ моея́
и помышле́нія,
и твори́ти
во всемъ во́лю
Твою́. Го́споди,
покры́й мя
отъ человѣ́къ
нѣ́которыхъ,
и бѣсо́въ, и
страсте́й, и
отъ вся́кія
ины́я
неподо́бныя
ве́щи. Го́споди,
вѣ́си, я́ко
твори́ши, я́коже
Ты во́лиши,
да бу́детъ
во́ля Твоя́
и во мнѣ грѣ́шнѣмъ:
я́ко
благослове́нъ
еси́ во вѣ́ки.
Ами́нь.
Молитва
8-я, ко
Господу
нашему
Іисусу
Христу:
Го́споди
Іису́се
Христе́, Сы́не
Бо́жій, ра́ди
честнѣ́йшія
Ма́тере
Твоея́, и
безпло́тныхъ
Твои́хъ а́нгелъ,
проро́ка же
и Предте́чи
и Крести́теля
Твоего́,
Богоглаго́ливыхъ
же апо́столъ,
свѣ́тлыхъ и
допропобѣ́дныхъ
му́ченикъ,
преподо́бныхъ
и Богоно́сныхъ
оте́цъ, и
всѣхъ святы́хъ
моли́твами,
изба́ви мя
настоя́щаго
обстоя́нія
бѣсо́вскаго.
Ей, Го́споди
мой и Тво́рче,
не хотя́й
сме́рти грѣ́шнаго,
но я́коже
обрати́тися
и жи́ву бы́ти
ему́, даждь и
мнѣ обраще́ніе
окая́нному
и недосто́йному;
изми́ мя отъ
устъ па́губнаго
змíя, зія́ющаго
пожре́ти мя
и свести́ во
адъ жи́ва. Ей,
Го́споди
мой, утѣше́ніе
мое́, Иже
мене́ ра́ди
окая́ннаго
въ тлѣ́нную
плоть оболкíйся,
исто́ргни
мя отъ окая́нства,
и утѣше́ніе
пода́ждь
души́ мое́й
окая́ннѣй.
Всади́ въ се́рдце
мое́ твори́ти
Твоя́
повелѣ́нія,
и оста́вити
лука́вая
дѣя́нія, и
получи́ти
блаже́нства
Твоя́: на Тя
бо, Го́споди,
упова́хъ,
спаси́ мя.
Молитва
9-я ко
Пресвятѣй
Богородицѣ:
Блага́го
Царя́ блага́я
Ма́ти, Пречи́стая
и
Благослове́нная
Богоро́дице
Марíе, ми́лость
Сы́на
Твоего́ и Бо́га
на́шего
изле́й на
стрáстную
мою́ ду́шу, и
Твои́ми
моли́твами
наста́ви мя
на дѣя́нія
блага́я: да
про́чее вре́мя
живота́
моего́ безъ
поро́ка
прейду́, и
Тобо́ю рай
да обря́щу,
Богоро́дице
Дѣ́во, еди́на
чи́стая и
благослове́нная.
Молитва
10-я, ко
святому
Ангелу
Хранителю:
Ангеле
Христо́въ,
храни́телю
мой святы́й,
и покрови́телю
души́ и тѣ́ла
моего́, вся
ми прости́,
ели́ка
согрѣши́хъ
во дне́шній
день: и отъ
вся́каго
лука́вствія,
проти́внаго
ми врага́
изба́ви мя:
да ни въ ко́емже
грѣсѣ́
прогнѣ́ваю
Бо́га моего́:
но моли́ за
мя грѣ́шнаго
и недосто́йнаго
раба́, я́ко
да досто́йна
мя пока́жеши
бла́гости и
ми́лости
Всесвяты́я
Тро́ицы, и Ма́тере
Го́спода
моего́ Іису́са
Христа́, и
всѣхъ святы́хъ.
Ами́нь.
Кондакъ
Богородицѣ:
Взбра́нной
воево́дѣ
побѣди́тельная,
я́ко изба́вльшеся
отъ злыхъ,
благода́рственная
воспису́емъ
Ти раби́
Твои́,
Богоро́дице:
но я́ко иму́щая
держа́ву
непобѣди́мую,
отъ вся́кихъ
насъ бѣдъ
свободи́, да
зове́мъ Ти:
ра́дуйся,
Невѣ́сто
неневѣ́стная.
Пресла́вная
Приснодѣ́во,
Ма́ти
Христа́ Бо́га,
принеси́ на́шу
моли́тву Сы́ну
Твоему́ и Бо́гу
на́шему, да
спасе́тъ
Тобо́ю ду́шы
на́шя.
Все
упова́ніе
мое́ на Тя
возлага́ю,
Ма́ти Бо́жія,
сохрани́ мя
подъ кро́вомъ
Твои́мъ.
Богоро́дице
Дѣ́во, не пре́зри
мене́ грѣ́шнаго,
тре́бующа
Твоея́ по́мощи
и Твоего́
заступле́нія:
на Тя бо
упова́ душа́
моя́, и поми́луй
мя.
Упова́ніе
мое́ Оте́цъ,
прибѣ́жище
мое́ Сынъ,
покро́въ
мой Духъ
Святы́й: Тро́ице
Свята́я, сла́ва
Тебѣ́.
Досто́йно
есть, я́ко
вои́стину,
блажи́ти Тя
Богоро́дицу,
присноблаже́нную
и пренепоро́чную
и Ма́терь Бо́га
на́шего.
Честнѣ́йшую
херуви́мъ и
сла́внѣйшую
безъ сравне́нія
серафи́мъ,
безъ истлѣ́нія
Бо́га Сло́ва
ро́ждшую, су́щую
Богоро́дицу
Тя велича́емъ.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Го́споди,
поми́луй (трижды).
Го́споди,
благослови́
(и
отпустъ).
Го́споди,
Іису́се
Христе́, Сы́не
Бо́жій, моли́твъ
ра́ди Пречи́стыя
Твоея́ Ма́тере,
преподо́бныхъ
и богоно́сныхъ
оте́цъ на́шихъ
и всѣхъ
святы́хъ
поми́луй
насъ. Ами́нь.
Молитва
св. Іоанна
Дамаскина,
юже, указуя
на одръ твой,
глаголи:
Влады́ко
Человѣколю́бче,
не уже́ ли
мнѣ одръ сей
гробъ бу́детъ?
Или́ еще́
окая́нную
мою́ ду́шу
просвѣти́ши
днемъ? Се ми
гробъ
предлежи́тъ,
се ми смерть
предстои́тъ.
Суда́
Твоего́, Го́споди,
бою́ся, и му́ки
безконе́чныя,
зло́е же
творя́ не
престаю́:
Тебе́ Го́спода
Бо́га моего́
всегда́
прогнѣвля́ю,
и Пречи́стую
Твою́ Ма́терь,
и вся небе́сныя
си́лы, и
свята́го
Ангела
храни́теля
моего́. Вѣмъ
у́бо, Го́споди,
я́ко
недосто́инъ
есмь
человѣколю́бія
Твоего́, но
досто́инъ
есмь вся́каго
осужде́нія
и му́ки. Но,
Го́споди,
или́ хощу́,
или́ не хощу́,
спаси́ мя.
Аще бо пра́ведника
спасе́ши,
ничто́же ве́ліе:
и а́ще чи́стаго
поми́луеши,
ничто́же
дивно: досто́йни
бо суть ми́лости
Твоея́. Но на
мнѣ грѣ́шнѣмъ
удиви́ ми́лость
Твою́: о семъ
яви́
человѣколю́біе
Твое́, да не
одолѣ́етъ
моя́ зло́ба
Твое́й
неизглаго́ланнѣй
бла́гости, и
милосе́рдію:
и я́коже хо́щеши,
устро́й о
мнѣ вещь.
И
такъ, хотяй
же возлещи
на постелю,
глаголи сіе:
Просвѣти́
о́чи мои́,
Христе́ Бо́же,
да не когда́
усну́ въ
смерть, да
не когда́
рече́тъ
врагъ мой:
укрѣпи́хся
на него́.
Сла́ва
Отцу́ и Сы́ну
и Свято́му
Ду́ху:
Засту́пникъ
души́ моея́
бу́ди, Бо́же,
я́ко
посредѣ́
хожду́ сѣ́тей
мно́гихъ:
изба́ви ми
отъ нихъ, и
спаси́ мя,
Бла́же, я́ко
Человѣколю́бецъ.
И ны́нѣ
и при́сно и
во вѣ́ки
вѣко́въ. Ами́нь.
Пресла́вную
Бо́жію Ма́терь,
и святы́хъ
Ангелъ
святѣ́йшую,
немо́лчно
воспои́мъ,
се́рдцемъ и
усты́
Богоро́дицу
сію́ исповѣ́дающе,
я́ко вои́стинну
ро́ждшую
намъ Бо́га
воплоще́нна,
и моля́щуюся
непреста́нно
о душа́хъ на́шихъ.
Таже
цѣлуй
крестъ твой,
и прекрести
крестомъ
мѣсто твое
отъ главы и
до ногъ,
такожде и
отъ всѣхъ
странъ,
глаголя
молитву
Честному
Кресту:
Да
воскре́снетъ
Богъ, и
расточа́тся
врази́ Его́,
и да бѣжа́тъ
отъ лица́
Его́, ненави́дящіи
Его́: я́ко
исчеза́етъ
дымъ, да
исче́знутъ:
я́ко та́етъ
воскъ отъ
лица́ огня́:
та́ко да
поги́бнутъ
бѣ́си отъ
лица́ лю́бящихъ
Бо́га, и зна́менующихся
кре́стнымъ
зна́меніемъ,
и въ весе́ліи
глаго́лющихъ:
ра́дуйся,
пречестны́й
и животворя́щій
Кре́сте
Госпо́день,
прогоня́яй
бѣ́сы си́лою
на тебѣ́
пропя́таго
Го́спода на́шего
Іису́са
Христа́, во
адъ сше́дшаго,
и попра́вшаго
си́лу діа́волю,
и дарова́вшаго
намъ тебе́
Крестъ Свой
честны́й, на
прогна́ніе
вся́каго
супоста́та.
О пречестны́й
и животворя́щій
Кре́сте
Госпо́день,
помога́й ми
со Свято́ю
Госпоже́ю
Дѣ́вою
Богоро́дицею,
и со всѣ́ми
святы́ми во
вѣ́ки. Ами́нь.
Или:
Огради́
мя, Го́споди,
си́лою
Честна́го и
Животворя́щаго
Твоего́
Креста́, и
сохрани́ мя
отъ вся́каго
зла.
Осла́би,
оста́ви,
прости́, Бо́же,
прегрѣше́нія
на́ша, во́льная
и нево́льная,
я́же въ сло́вѣ
и въ дѣ́лѣ, я́же
въ вѣ́дѣніи
и не въ вѣ́дѣніи,
я́же во дни и
въ нощи́, я́же
во умѣ́ и въ
помышле́ніи:
вся намъ
прости́, я́ко
Благъ и
Человѣколю́бецъ.
Молитва:
Ненави́дящихъ
и оби́дящихъ
насъ прости́,
Го́споди
Человѣколю́бче.
Благотворя́щимъ
благосотвори́.
Бра́тіямъ и
сро́дникомъ
на́шимъ да́руй
я́же ко
спасе́нію
проше́нія и
жизнь вѣ́чную:
въ не́мощехъ
су́щія
посѣти́ и
исцѣле́ніе
да́руй. Иже
на мо́ри
упра́ви.
Путеше́ствующимъ
спутеше́ствуй.
Правосла́внымъ
христіа́номъ
спобо́рствуй.
Служа́щимъ
и ми́лующимъ
насъ грѣхо́въ
оставле́ніе
да́руй.
Заповѣ́давшихъ
намъ
недосто́йнымъ
моли́тися о
нихъ поми́луй
по вели́цѣй
Твое́й ми́лости.
Помяни́, Го́споди,
пре́жде усо́пшихъ
оте́цъ и бра́тій
на́шихъ и
упо́кой ихъ,
идѣ́же
присѣща́етъ
свѣтъ лица́
Твоего́.
Помяни́, Го́споди,
бра́тій на́шихъ
плѣне́нныхъ,
и изба́ви я́
отъ вся́каго
обстоя́нія.
Помяни́, Го́споди,
плодонося́щихъ
и добродѣ́лающихъ
во святы́хъ
Твои́хъ це́рквахъ,
и даждь имъ
я́же ко
спасе́нію
проше́нія и
жизнь вѣ́чную.
Помяни́, Го́споди,
и насъ,
смире́нныхъ
и грѣ́шныхъ
и недосто́йныхъ
рабъ Твои́хъ,
и просвѣти́
нашъ умъ свѣ́томъ
ра́зума
Твоего́, и
наста́ви
насъ на
стезю́ за́повѣдей
Твои́хъ,
моли́твами
Пречи́стыя
Влады́чицы
на́шея
Богоро́дицы
и Приснодѣ́вы
Марíи и
всѣхъ Твои́хъ
святы́хъ, я́ко
благослове́нъ
еси́ во вѣ́ки
вѣко́въ. Ами́нь.
Исповѣданіе
грѣховъ
повседневное:
Исповѣ́даю
Тебѣ́ Го́споду
Бо́гу моему́
и Творцу́, во
Святѣ́й Тро́ицѣ
Еди́ному,
сла́вимому
и покланя́емому,
Отцу́, и Сы́ну,
и Свято́му
Ду́ху, вся
моя́ грѣхи́,
я́же содѣ́яхъ
во вся дни
живота́
моего́, и на
вся́кій
часъ, и въ
настоя́щее
вре́мя, и въ
преше́дшія
дни и но́щи,
дѣ́ломъ, сло́вомъ,
помышле́ніемъ,
объяде́ніемъ,
пія́нствомъ,
тайнояде́ніемъ,
праздносло́віемъ,
уны́ніемъ,
лѣ́ностію,
прекосло́віемъ,
непослуша́ніемъ,
оклевета́ніемъ,
осужде́ніемъ,
небреже́ніемъ,
самолю́біемъ,
многостяжа́ніемъ,
хище́ніемъ,
неправдоглаго́ланіемъ,
скверноприбы́тчествомъ,
мшелои́мствомъ,
ревнова́ніемъ,
за́вистію,
гнѣ́вомъ,
памятозло́біемъ,
не́навистію,
лихои́мствомъ
и всѣ́ми мои́ми
чу́вствы:
зрѣ́ніемъ,
слу́хомъ,
обоня́ніемъ,
вку́сомъ,
осяза́ніемъ
и про́чими
мои́ми
грѣхи́, душе́вными
вку́пѣ и
тѣле́сными,
и́миже Тебѣ́
Бо́га моего́
и Творца́
прогнѣ́вахъ,
и бли́жняго
моего́
онепра́вдовахъ:
о сихъ жалѣ́я,
ви́нна себе́
Тебѣ́ Бо́гу
моему́
представля́ю,
и имѣ́ю во́лю
ка́ятися: то́чію,
Го́споди Бо́же
мой, помози́
ми, со слеза́ми
смире́нно
молю́ Тя:
преше́дшая
же согрѣше́нія
моя́ милосе́рдіемъ
Твои́мъ
прости́ ми, и
разрѣши́
отъ всѣхъ
сихъ, я́же
изглаго́лахъ
предъ Тобо́ю,
я́ко Благъ и
Человѣколю́бецъ.
Егда
предаешися
сну, глаголи:
Въ ру́цѣ
Твои́, Го́споди
Іису́се
Христе́, Бо́же
мой, предаю́
духъ мой: Ты
же мя
благослови́,
Ты мя поми́луй
и живо́тъ вѣ́чный
да́руй ми.
Ами́нь.
