Моли́твами
святы́хъ
оте́цъ на́шихъ,
Го́споди
Іису́се
Христе́, Бо́же
нашъ, поми́луй
насъ. Ами́нь.
Сла́ва
Тебѣ́, Бо́же
нашъ, сла́ва
Тебѣ́.
Царю́
Небе́сный,
Утѣ́шителю,
Ду́ше и́стины,
Иже вездѣ́
сый и вся́
исполня́яй,
Сокро́вище
благи́хъ и
жи́зни Пода́телю,
пріиди́ и
всели́ся въ
ны, и очи́сти
ны отъ вся́кія
скве́рны, и
спаси́, Бла́же,
ду́шы на́шя.
Святы́й
Бо́же, Святы́й
Крѣ́пкій,
Святы́й
Безсме́ртный,
поми́луй
насъ (трижды).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Пресвята́я
Тро́ице,
поми́луй
насъ; Го́споди,
очи́сти
грѣхи́ на́шя;
Влады́ко,
прости́
беззако́нія
на́ша; Святы́й,
посѣти́ и
исцѣли́ не́мощи
на́шя, и́мене
Твоего́ ра́ди.
Го́споди,
поми́луй (трижды).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Отче
нашъ, Иже
еси́ на
небесѣ́хъ!
Да святи́тся
и́мя Твое́,
да пріи́детъ
Ца́рствіе
Твое́, да бу́детъ
во́ля Твоя́,
я́ко на
небеси́ и на
земли́.
Хлѣбъ нашъ
насу́щный
даждь намъ
днесь; и
оста́ви
намъ до́лги
на́шя, я́коже
и мы оставля́емъ
должнико́мъ
на́шымъ; и не
введи́ насъ
во искуше́ніе,
но изба́ви
насъ отъ
лука́ваго.
Го́споди,
поми́луй (12).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Пріиди́те,
поклони́мся
Царе́ви на́шему
Бо́гу.
Пріиди́те,
поклони́мся
и припаде́мъ
Христу́,
Царе́ви на́шему
Бо́гу.
Пріиди́те,
поклони́мся
и припаде́мъ
Самому́
Христу́,
Царе́ви и Бо́гу
на́шему.
И
настоящыя
псалмы:
Псаломъ 22.
Госпо́дь
пасе́тъ мя, и
ничто́же мя
лиши́тъ. На
мѣ́стѣ зла́чнѣ,
та́мо всели́
мя, на водѣ́
поко́йнѣ
воспита́ мя.
Ду́шу мою́
обрати́,
наста́ви мя
на стези́
пра́вды, и́мене
ра́ди
Своего́. Аще
бо и пойду́
по средѣ́ сѣ́ни
сме́ртныя,
не убою́ся
зла, яко Ты
со мно́ю еси́:
жезлъ Твой и
па́лица
Твоя́, та мя
утѣ́шиста.
Угото́валъ
еси́ пре́до
мно́ю трапе́зу
сопроти́въ
стужа́ющымъ
мнѣ: ума́стилъ
еси́ еле́омъ
главу́ мою́,
и ча́ша Твоя́
упоява́ющи
мя, я́ко
держа́вна. И
ми́лость
Твоя́
пожене́тъ
мя вся дни
живота́
моего́: и е́же
всели́тимися
въ домъ
Госпо́день
въ долготу́
дній.
Псаломъ
23.
Госпо́дня
земля́, и
исполне́ніе
ея́, вселе́нная,
и вси живу́щіи
на ней. Той
на моря́хъ
основа́лъ ю́
есть и на
рѣка́хъ
угото́валъ
ю́ есть. Кто
взы́деть на
го́ру Госпо́дню?
или́ кто ста́нетъ
на мѣ́стѣ
святѣ́мъ
Его́? непови́ненъ
рука́ма, и
чисть се́рдцемъ:
и́же не прія́тъ
всу́е ду́шу
свою́, и не
кля́тся ле́стію
и́скреннему
своему́. Сей
пріи́метъ
благослове́ніе
отъ Го́спода,
и ми́лостыню
отъ Бо́га
Спа́са
своего́. Сей
родъ и́щущихъ
Го́спода, и́щущихъ
лице́ Бо́га
Іа́ковля.
Возми́те
врата́ кня́зи
ва́шя, и
возми́теся
врата́ вѣ́чная:
и вни́деть
Царь сла́вы.
Кто есть сей
Царь сла́вы?
Госпо́дь
крѣ́покъ и
си́ленъ,
Госпо́дь си́ленъ
въ бра́ни.
Возми́те
врата́ кня́зи
ва́шя, и
возми́теся
врата́ вѣ́чная:
и вни́деть
Царь сла́вы.
Кто есть сей
Царь сла́вы?
Госпо́дь
силъ, Той
есть Царь
сла́вы.
Псаломъ
115.
Вѣ́ровахъ,
тѣ́мже
возглаго́лахъ:
азъ же смири́хся
зѣло́. Азъ же
рѣхъ во
изступле́ніи
мое́мъ:
всякь
человѣ́къ
ложь. Что
возда́мъ Го́сподеви
о всѣхъ, я́же
воздаде́ ми?
Ча́шу спасе́нія
пріиму́, и и́мя
Госпо́дне
призову́:
моли́твы
моя́ Го́сподеви
возда́мъ
предъ всѣ́ми
людьми́ Его́.
Честна́
предъ Го́сподемъ
смерть
преподо́бныхъ
Его. О Го́споди,
азъ рабь
Твой, азъ
рабъ Твой, и
сынъ рабы́ни
Твоея́:
растерза́лъ
еси́ у́зы
моя́. Тебѣ́
пожру́ же́ртву
хвалы́, и во
и́мя Госпо́дне
призову́:
моли́твы
моя́ Го́сподеви
возда́мъ
предъ всѣ́ми
людьми́ Его́:
во дворѣ́хъ
до́му Госпо́дня,
посредѣ́
тебе́,
Іерусали́ме.
Сла́ва
Отцу́, и Сы́ну,
и Свято́му
Ду́ху, и ны́нѣ
и при́сно, и
во вѣ́ки
вѣко́въ. Ами́нь.
Аллилу́іа,
аллилу́іа,
аллилу́іа.
Сла́ва Тебѣ́,
Бо́же (трижды).
Го́споди,
поми́луй
(трижды).
Тропари,
гласъ 8-й:
Беззако́нія
моя́ пре́зри,
Го́споди,
оть Дѣ́вы
рожде́йся, и
се́рдце мое́
очи́сти,
храмъ то
творя́
пречи́стому
Твоему́ тѣ́лу
и кро́ви:
ниже́ отри́ни
мене́ отъ
Твоего́
лица́, безъ
числа́ имѣ́яй
ве́лію ми́лость.
Сла́ва
Отцу́ и Сы́ну
и Свято́му
Ду́ху:
Во
прича́стіе
святы́нь
Твои́хъ ка́ко
дерзну́
недосто́йный?
Аще бо
дерзну́ къ
Тебѣ́
приступи́ти
съ досто́йными,
хито́нъ мя
облича́етъ,
я́ко нѣсть
вече́рній: и
осужде́ніе
исхода́тайствую
многогрѣ́шной
души́ мое́й.
Очи́сти, Го́споди,
скве́рну
души́ моея́,
и спаси́ мя,
я́ко
Человѣколю́бецъ.
И
ны́нѣ и при́сно
и во вѣ́ки
вѣко́въ. Ами́нь.
Мно́гая
мно́жества
мои́хъ,
Богоро́дице,
прегрѣше́ній,
къ Тебѣ
прибѣго́хъ,
Чи́стая,
спасе́нія
тре́буя:
посѣти́ не́моществующую
мою́ ду́шу, и
моли́ Сы́на
Твоего́ и Бо́га
на́шего, да́ти
ми оставле́ніе,
я́же содѣ́яхъ
лю́тыхъ, еди́на
благослове́нная.
Во
святую же и
Великую
Четыредесятницу
рцы сіе:
Егда́
сла́вніи
ученицы́ на
умове́ніи
ве́чери
просвѣща́хуся,
тогда́ Іу́да
злочести́вый
сребролю́біемъ
неду́говавъ
омрача́шеся,
и беззако́ннымъ
судія́мъ
Тебе́ пра́веднаго
Судію́
предае́тъ.
Виждь, имѣ́ній
рачи́телю,
сихъ ра́ди
удавле́ніе
употреби́вша:
бѣжи́ несы́тыя
души́, Учи́телю
такова́я
дерзну́вшія.
Иже о всѣхъ
благíй Го́споди,
сла́ва Тебѣ́.
Псаломъ
50.
Поми́луй
мя, Бо́же, по
вели́цѣй ми́лости
Твое́й, и по
мно́жеству
щедро́тъ
Твои́хъ очи́сти
беззако́ніе
мое́. Наипа́че
омы́й мя отъ
беззако́нія
моего́, и отъ
грѣха́
моего́ очи́сти
мя; яко
беззако́ніе
мое́ азъ зна́ю,
и грѣхъ мой
пре́до мно́ю
есть вы́ну.
Тебѣ́ Еди́ному
согрѣши́хъ
и лука́вое
предъ Тобо́ю
сотвори́хъ,
я́ко да
оправди́шися
во словесѣ́хъ
Твои́хъ, и
побѣди́ши
внегда́
суди́ти Ти.
Се бо, въ
беззако́ніихъ
зача́тъ
есмь, и во
грѣсѣ́хъ
роди́ мя ма́ти
моя́. Се бо, и́стину
возлюби́лъ
еси́; безвѣ́стная
и та́йная
прему́дрости
Твоея́ яви́лъ
ми еси́.
Окропи́ши
мя vссо́помъ,
и очи́щуся;
омы́еши мя, и
па́че снѣ́га
убѣлю́ся.
Слу́ху
моему́ да́си
ра́дость и
весе́ліе;
возра́дуются
ко́сти
смире́нныя.
Отврати́
лице́ Твое́
отъ грѣхъ
мои́хъ и вся
беззако́нія
моя́ очи́сти.
Се́рдце чи́сто
сози́жди во
мнѣ, Бо́же, и
духъ правъ
обнови́ во
утро́бѣ мое́й.
Не отве́ржи
мене́ отъ
лица́
Твоего́ и Ду́ха
Твоего́
Свята́го не
отъими́ отъ
мене́. Возда́ждь
ми ра́дость
спасе́нія
Твоего́ и Ду́хомъ
влады́чнимъ
утверди́ мя.
Научу́
беззако́нныя
путе́мъ
Твои́мъ, и
нечести́віи
къ Тебѣ́
обратя́тся.
Изба́ви мя
отъ крове́й,
Бо́же, Бо́же
спасе́нія
моего́;
возра́дуется
язы́къ мой
пра́вдѣ
Твое́й. Го́споди,
устнѣ́ мои́
отве́рзеши,
и уста́ моя́
возвѣстя́тъ
хвалу́ Твою́.
Яко а́ще бы
восхотѣ́лъ
еси́ же́ртвы,
далъ быхъ у́бо:
всесожже́нія
не
благоволи́ши.
Же́ртва Бо́гу
духъ
сокруше́нъ;
се́рдце
сокруше́нно
и смире́нно
Богъ не
уничижи́тъ.
Ублажи́, Го́споди,
благоволе́ніемъ
Твои́мъ Сіо́на,
и да сози́ждутся
стѣ́ны
Іерусали́мскія.
Тогда́
благоволи́ши
же́ртву пра́вды,
возноше́ніе
и всесожега́емая;
тогда
возложа́тъ
на oлта́рь
Твой тельцы́.
И
абіе:
Канонъ, гласъ 2-й.
Пѣснь 1.
Ирмо́съ: Гряди́те
лю́діе,
пои́мъ
пѣснь
Христу́
Бо́гу,
раздѣ́льшему
мо́ре,
и
наста́вльшему
лю́ди,
я́же
изведе́
изъ
рабо́ты
еги́петскія,
я́ко
просла́вися.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Хлѣбъ
живота́ вѣ́чнующаго
да бу́детъ
ми Тѣ́ло
Твое́ Свято́е,
благоутро́бне
Го́споди, и
Честна́я
Кровь, и
неду́гъ
многообра́зныхъ
исцѣле́ніе.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Оскверне́нъ
дѣ́лы безмѣ́стными
окая́нный,
Твоего́
Пречи́стаго
Тѣ́ла и Боже́ственныя
Кро́ве
недосто́инъ
есмь, Христе́;
причаще́нія,
его́же мя
сподо́би.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Земле́ блага́я,
благослове́нная
Богоневѣ́сто,
класъ прозя́бшая
неора́нный
и спаси́тельный
мíру, сподо́би
мя сей яду́ща
спасти́ся.
Пѣснь
3.
Ирмо́съ:
На
ка́мени мя
вѣ́ры
утверди́въ,
разши́рилъ
еси́ уста́
моя́ на
враги́ моя́.
Возвесели́бося
духъ мой,
внегда́ пѣ́ти:
нѣсть святъ
я́коже Богь
нашъ, и
нѣсть пра́веденъ
па́че Тебе́,
Го́споди.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Сле́зныя
ми пода́ждь,
Христе́, ка́пли,
скве́рну се́рдца
моего́
очища́ющыя:
я́ко да
благо́ю со́вѣстію
очище́нъ, вѣ́рою
прихожду́ и
стра́хомъ,
Влады́ко, ко
причаще́нію
Боже́ственныхъ
даро́въ
Твои́хъ.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Во
оставле́ніе
да бу́детъ
ми прегрѣше́ній
Пречи́стое
Тѣ́ло Твое́
и Боже́ственная
Кровь, Ду́ха
же Свята́го
обще́ніе, и
въ жизнь вѣ́чную,
Человѣколю́бче,
и страсте́й
и ско́рбей
отчужде́ніе.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Хлѣ́ба
живо́тнаго
трапе́за
Пресвята́я,
свы́ше ми́лости
ра́ди сше́дшаго,
и мíрови но́вый
живо́тъ даю́щаго,
и мене́ ны́нѣ
сподо́би
недосто́йнаго,
со стра́хомъ
вкуси́ти
сего́, и жи́ву
бы́ти.
Пѣснь
4.
Ирмо́съ:
Прише́лъ
еси́ отъ Дѣ́вы,
не хода́тай,
ни Ангелъ,
но Самъ Го́споди
вопло́щся и
спаслъ еси́
всего́ мя
человѣ́ка.
Тѣмъ зову́
Ти: сла́ва си́лѣ
Твое́й, Го́споди.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Восхотѣ́лъ
еси́, насъ ра́ди
вопло́щся,
Многоми́лостиве,
закла́нъ бы́ти
я́ко овча́,
грѣхъ ра́ди
человѣ́ческихъ:
тѣ́мже молю́
Тя, и мои́
очи́сти
согрѣше́нія.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Исцѣли́
души́ моея́
я́звы, Го́споди,
и всего́
освяти́; и
сподо́би,
Влады́ко, я́ко
да причащу́ся
та́йныя
Твоея́ Боже́ственныя
ве́чери,
окая́нный.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Уми́лостиви
и мнѣ Су́щаго
оть утро́бы
Твоея́,
Влады́чице,
и соблюди́
мя нескве́рна
раба́
Твоего́, и
непоро́чна,
я́ко да пріе́мъ
у́мнаго би́сера,
освящу́ся.
Пѣснь
5.
Ирмо́съ:
Свѣ́та
пода́телю и
вѣко́въ Тво́рче,
Го́споди, во
свѣ́тѣ Твои́хъ
повелѣ́ній
наста́ви
насъ: ра́звѣ
бо Тебе́, ино́го
бо́га не зна́емъ.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Якоже
предре́клъ
еси́, Христе́,
да бу́детъ у́бо
худо́му
рабу́
Твоему́, и во
мнѣ пребу́ди,
я́коже
обѣща́лся
еси́: се бо
Тѣ́ло Твое́
ямъ Боже́ственное,
и пію́ Кровь
Твою́.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Сло́ве
Бо́жій и Бо́же,
угль Тѣ́ла
Твоего́ да
бу́детъ мнѣ
помраче́нному
въ просвѣще́ніе,
и очище́ніе
оскверне́нной
души́ мое́й
Кровь Твоя́.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Марíе,
Ма́ти Бо́жія,
благоуха́нія
честно́е
селе́ніе,
Твои́ми
моли́твами
сосу́дъ мя
избра́нный
содѣ́лай, я́ко
да освяще́ній
причащу́ся
Сы́на
Твоего́.
Пѣснь
6.
Ирмо́съ:
Въ
бе́зднѣ
грѣхо́внѣй
валя́яся,
неизслѣ́дную
милосе́рдія
Твоего́
призыва́ю
бе́здну отъ
тли, Бо́же,
мя возведи́.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Умъ,
ду́шу и се́рдце
освяти́, Спа́се,
и тѣ́ло мое́:
и сподо́би
неосужде́нно,
Влады́ко, къ
стра́шнымъ
та́йнамъ
приступи́ти.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Дабы́
устрани́лся
отъ страсте́й,
и Твоея́
благода́ти
имѣлъ бы
приложе́ніе,
живота́ же
утвержде́ніе,
причаще́ніемъ
Святы́хъ,
Христе́, Та́инъ
Твои́хъ.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Бо́жіе,
Бо́же, Сло́во
Свято́е,
всего́ мя
освяти́ ны́нѣ
приходя́щаго
къ Боже́ственнымъ
Твои́мъ Та́йнамъ,
Святы́я Ма́тере
Твоея́
мольба́ми.
Го́споди,
поми́луй (трижды).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Кондакъ,
гласъ 2-й:
Хлѣбъ,
Христе́, взя́ти
не пре́зри
мя, Тѣ́ло
Твое́, и Боже́ственную
Твою́ ны́нѣ
Кровь, пречи́стыхъ,
Влады́ко, и
стра́шныхъ
Твои́хъ Та́инъ
причасти́тися
окая́ннаго,
да не бу́детъ
ми въ судъ,
да бу́деть
же ми въ
живо́тъ вѣ́чный
и безсме́ртный.
Пѣснь
7.
Ирмо́съ:
Тѣ́лу
злато́му
прему́дрыя
дѣ́ти не
послужи́ша,
и вь пла́мень
са́ми поидо́ша,
и бо́ги ихъ
обруга́ша,
среди́ пла́мене
возопи́ша, и
ороси́ я́
Ангелъ: услы́шася
уже́ устъ ва́шихъ
моли́тва.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Исто́чникъ
благи́хъ,
причаще́ніе,
Христе́,
безсме́ртныхъ
Твои́хъ ны́нѣ
Та́инствъ
да бу́детъ
ми свѣтъ, и
живо́ть, и
безстра́стіе,
и къ преспѣ́янію
же и умноже́нію
добродѣ́тели
Боже́ственнѣйшія
хода́тайственно,
еди́не Бла́же,
я́ко да сла́влю
Тя.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Да
изба́влюся
оть страсте́й,
и враго́въ и
ну́жды, и вся́кія
ско́рби, тре́петомъ,
и лю́бовію
со
благоговѣ́ніемъ,
Человѣколю́бче,
приступа́яй
ны́нѣ къ
Твои́мъ
безсме́ртнымъ
и Боже́ственнымъ
Та́йнамъ, и
пѣ́ти Тебѣ́
сподо́би:
благослове́нъ
еси́, Го́споди,
Бо́же оте́ць
на́шихъ.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Спа́са
Христа́ ро́ждшая
па́че ума́,
Богоблагода́тная,
молю́ Тя ны́нѣ,
рабъ Твой,
Чи́стую
нечи́стый:
хотя́щаго
мя ны́нѣ къ
пречи́стымъ
Та́йнамъ
приступи́ти,
очи́сти
всего́ отъ
скве́рны
пло́ти и ду́ха.
Пѣснь
8.
Ирмо́съ:
Въ пещь о́гненную
ко о́трокомъ
Евре́йскимъ
снизше́дшаго,
и пла́мень
въ ро́су
прело́жшаго
Бо́га, по́йте
дѣ́ла я́ко
Го́спода, и
превозноси́те
во вся вѣ́ки.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Небе́сныхъ,
и стра́шныхъ,
и святы́хъ
Твои́хъ,
Христе́, ны́нѣ
Та́инъ, и
Боже́ственныя
Твоея́ и та́йныя
ве́чери, о́бщника
бы́ти и мене́
сподо́би
отча́яннаго,
Бо́же Спа́се
мой.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Подъ
Твое́ прибѣ́гь
благоутро́біе,
Бла́же, со
стра́хомъ
зову́ Ти: во
мнѣ пребу́ди
Спа́се, и азъ,
я́коже
реклъ еси́,
въ Тебѣ́: се
бо дерза́я
на ми́лость
Твою́, ямъ Тѣ́ло
Твое́, и пію́
Кровь Твою́.
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Трепе́щу
пріе́мля
огнь, да не
опалю́ся я́ко
воскъ, и я́ко
трава́: оле́
стра́шнаго
та́инства!
оле́
благоутро́бія
Бо́жія! ка́ко
Боже́ственнаго
Тѣ́ла и Кро́ве
бре́ніе
причаща́юся,
и нетлѣ́ненъ
сотворя́юся.
Пѣснь
9.
Ирмо́съ:
Безнача́льна
Роди́теля
Сынъ, Богь и
Го́сподь,
вопло́щся
отъ Дѣ́вы,
намъ яви́,
омраче́нныя
просвѣти́,
собра́ти
расточе́нная:
тѣмъ всепѣ́тую
Богоро́дицу
велича́емъ.
Се́рдце
чи́сто сози́жди
во мнѣ, Бо́же,
и духъ правъ
обнови́ во
утро́бѣ мое́й.
Христо́съ
есть, вкуси́те
и ви́дите:
Госпо́дь
насъ ра́ди,
по намъ бо
дре́вле бы́вый,
еди́ною
Себе́ прине́съ,
я́ко
приноше́ніе
Отцу́
Своему́, при́сно
закала́ется,
освяща́яй
причаща́ющыяся.
Не
отве́ржи
мене́ отъ
лица́
Твоего́, и Ду́ха
Твоего́
свята́го не
отъими́ оть
мене́.
Душе́ю
и тѣ́ломъ да
освящу́ся,
Влады́ко, да
просвѣщу́ся,
да спасу́ся,
да бу́ду
домъ Твой,
причаще́ніемъ
свяще́нныхъ
Та́инъ, живу́щаго
Тя имѣ́я въ
себѣ́ со
Отце́мъ и Ду́хомъ,
Благодѣ́телю
Многоми́лостиве.
Сла́ва
Отцу́ и Сы́ну
и Свято́му
Ду́ху:
Якоже
огнь да бу́детъ
ми, и я́ко
свѣтъ, Тѣ́ло
Твое́ и
Кровь, Спа́се
мой,
пречестна́я,
опаля́я
грѣхо́вное
вещество́,
сжига́я же
страсте́й
те́рніе, и
всего́ мя
просвѣща́я,
покланя́тися
Божеству́
Твоему́.
И
ны́нѣ и при́сно
и во вѣ́ки
вѣко́въ. Ами́нь.
Богь
воплоти́ся
отъ чи́стыхъ
крове́й
Твои́хъ: тѣ́мже
всякій родъ
пое́ть Тя,
Влады́чице,
у́мная же
мно́жества
сла́вятъ, я́ко
Тобо́ю я́вѣ
узрѣ́ша всѣ́ми
Влады́чествующаго,
осуществова́вшагося
человѣ́чест-вомъ.
И
абіе:
Досто́йно
есть, я́ко
вои́стину,
блажи́ти Тя
Богоро́дицу,
присноблаже́нную
и пренепоро́чную
и Ма́терь Бо́га
на́шего.
Честнѣ́йшую
херуви́мъ и
сла́внѣйшую
безъ сравне́нія
серафи́мъ,
безъ истлѣ́нія
Бо́га Сло́ва
ро́ждшую, су́щую
Богоро́дицу
Тя велича́емъ.
Святы́й
Бо́же, Святы́й
Крѣ́пкій,
Святы́й
Безсме́ртный,
поми́луй
насъ (трижды).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Пресвята́я
Тро́ице,
поми́луй
насъ; Го́споди,
очи́сти
грѣхи́ на́шя;
Влады́ко,
прости́
беззако́нія
на́ша; Святы́й,
посѣти́ и
исцѣли́ не́мощи
на́шя, и́мене
Твоего́ ра́ди.
Го́споди,
поми́луй (трижды).
Сла́ва
Отцу́ и Сы́ну
и Свято́му
Ду́ху, и ны́нѣ
и при́сно и
во вѣ́ки
вѣко́въ. Ами́нь.
Отче
нашъ, Иже
еси́ на
небесѣ́хъ!
Да святи́тся
и́мя Твое́,
да пріи́детъ
Ца́рствіе
Твое́, да бу́детъ
во́ля Твоя́,
я́ко на
небеси́ и на
земли́.
Хлѣбъ нашъ
насу́щный
даждь намъ
днесь; и
оста́ви
намъ до́лги
на́шя, я́коже
и мы оставля́емъ
должнико́мъ
на́шымъ; и не
введи́ насъ
во искуше́ніе,
но изба́ви
насъ отъ
лука́ваго.
Тропарь
дне, аще
есть
праздникъ
Христова
Рождества,
или иный.
Аще недѣля,
тропарь
воскресный
по гласу.
Аще
же
ни,
сія:
Тропари,
гласъ 6-й:
Поми́луй
насъ, Го́споди,
поми́луй
насъ: вся́каго
бо отвѣ́та
недоумѣ́юще,
сію́ Ти моли́тву
я́ко Влады́цѣ
грѣ́шніи
прино́симъ:
поми́луй
насъ.
Сла́ва
Отцу́ и Сы́ну
и Свято́му
Ду́ху:
Го́споди,
поми́луй
насъ, на Тя
бо упова́хомъ,
не прогнѣ́вайся
на ны зѣло́,
нижé помяни́
беззако́ній
на́шихъ: но
при́зри и ны́нѣ
я́ко
благоутро́бенъ,
и изба́ви ны
отъ врагъ на́шихъ.
Ты бо еси́
Богъ нашъ, и
мы лю́діе
Твои́, вси
дѣлá рукý
Твое́ю, и и́мя
Твое́
призыва́емъ.
И
ны́нѣ и при́сно
и во вѣ́ки
вѣко́въ. Ами́нь.
Милосе́рдія
две́ри отве́рзи
намъ,
Благослове́нная
Богоро́дице,
надѣ́ющіися
на Тя да не
поги́бнемъ,
но да изба́вимся
Тобо́ю отъ
бѣдъ: Ты бо
еси́ спасе́ніе
ро́да
христіа́нскаго.
Го́споди,
поми́луй
(40).
И
поклоны,
елико
хощеши.
И абіе
настойщыя
стихи:
Хотя́
я́сти,
человѣ́че,
Тѣ́ло Влады́чне,
Стра́хомъ
приступи́,
да не опали́шися:
огнь бо есть.
Боже́ственную
же пія́
Кровь ко
обще́нію,
Пе́рвѣе
примири́ся
тя опеча́лившимъ,
Та́же
дерза́я, таи́нственное
бра́шно
яждь.
Ины
стихи:
Пре́жде
прича́стія
стра́шныя
же́ртвы
Животворя́щаго
Тѣ́ла Влады́чня,
Симъ
помоли́ся о́бразомъ
со тре́петомъ:
Молитва
1-я, Великаго
Василія:
Влады́ко
Го́споди
Іису́се
Христе́, Бо́же
нашъ, исто́чниче
жи́зни и
безсме́ртія,
всея́ тва́ри
ви́димыя и
неви́димыя
Содѣ́телю,
безнача́льнаго
Отца́
соприсносу́щный
Сы́не и
собезнача́льный:
премно́гія
ра́ди бла́гости,
въ послѣ́днія
дни въ плоть
оболкíйся и
распны́йся,
и погребы́йся
за ны
неблагода́рныя
и злонра́вныя,
и Твое́ю кро́вію
обнови́вый
растлѣ́вшее
грѣхо́мъ
естество́
на́ше: Самъ,
Безсме́ртный
Царю́,
пріими́ и
мое́ грѣ́шнаго
покая́ніе, и
приклони́ у́хо
Твое́ мнѣ, и
услы́ши
глаго́лы
моя́.
Согрѣши́хъ
бо, Го́споди,
согрѣши́хъ
на не́бо и
предъ Тобо́ю,
и нѣсмь
досто́инъ
воззрѣ́ти
на высоту́
сла́вы
Твоея́:
прогнѣ́вахъ
бо Твою́ бла́гость,
Твоя́ за́повѣди
преступи́въ,
и не послу́шавъ
Твои́хъ
повелѣ́ній.
Но Ты, Го́споди,
незло́бивъ
сый,
долготерпѣли́въ
же и многоми́лостивъ,
не пре́далъ
еси́ мя поги́бнути
со беззако́ньми
мои́ми,
моего́ вся́чески
ожида́я
обраще́нія.
Ты бо реклъ
еси́,
Человѣколю́бче,
проро́комъ
Твои́мъ: я́ко
хотѣ́ніемъ
не хощу́ сме́рти
грѣ́щника,
но е́же
обрати́тися
и жи́ву бы́ти
ему́. Не хо́щеши
бо, Влады́ко,
созда́нія
Твое́ю руку́
погуби́ти,
ниже́
благоволи́ши
о поги́бели
человѣ́честѣй,
но хо́щеши
всѣмъ
спасти́ся, и
въ ра́зумъ и́стины
пріити́. Тѣ́мже
и азъ, а́ще и
недосто́инъ
есмь небесе́
и земли́, и
сея́ привре́менныя
жи́зни,
всего́ себя́
повину́въ
грѣху́, и
сласте́мъ
порабо́тивъ,
и Твой
оскверни́въ
о́бразъ: но
творе́ніе и
созда́ніе
Твое́ бывъ,
не отчаява́ю
своего́
спасе́нія
окая́нный,
на Твое́ же
безмѣ́рное
благоутро́біе
дерза́я
прихожду́.
Пріими́ у́бо
и мене́,
Человѣколю́бче
Го́споди, я́коже
блудни́цу, я́ко
разбо́йника,
я́ко мытаря́,
и я́ко блу́днаго:
и возми́ мое́
тя́жкое бре́мя
грѣхо́въ,
грѣхъ
вземля́й мíра,
и не́мощи
человѣ́ческія
исцѣля́яй,
тружда́ющыяся
и обремене́нныя
къ Себѣ́
призыва́яй
и упокоева́яй:
не прише́дый
призва́ти
пра́ведныя,
но грѣ́шныя
на покая́ніе:
и очи́сти мя
оть вся́кія
скве́рны
пло́ти и ду́ха,
и научи́ мя
соверша́ти
святы́ню во
стра́сѣ
Твое́мъ: я́ко
да чи́стымъ
свѣ́дѣніемъ
со́вѣсти
моея́, святы́нь
Твои́хъ
часть пріе́мля,
соединю́ся
свято́му Тѣ́лу
Твоему́ и
Кро́ви, и имѣ́ю
Тебе́ во мнѣ
живу́ща и
пребыва́юща,
со Отце́мъ, и
Святы́мъ
Твои́мъ Ду́хомъ.
Ей, Го́споди
Іису́се
Христе́, Бо́же
мой, и да не
въ судъ ми
бу́детъ
прича́стіе
пречи́стыхъ
и животворя́щихъ
Та́инъ Твои́хъ,
ниже́ да не́мощенъ
бу́ду душе́ю
же и тѣ́ломъ,
оть е́же
недосто́йнѣ
тѣмъ
причаща́тися,
но даждь ми,
да́же до
коне́чнаго
моего́
издыха́нія,
неосужде́нно
воспріима́ти
часть святы́нь
Твои́хъ, въ
Ду́ха Свята́го
обще́ніе, въ
напу́тіе
живота́ вѣ́чнаго,
и во
благопрія́тенъ
отвѣ́ть на
стра́шнѣмъ
суди́щи
Твое́мъ: я́ко
да и азъ со
всѣ́ми
избра́нными
Твои́ми о́бщникъ
бу́ду нетлѣ́нныхъ
Твои́хъ
благь, я́же
угото́валъ
еси́ лю́бящымъ
Тя, Го́споди:
въ ни́хже
препросла́вленъ
еси́ во вѣ́ки.
Ами́нь.
Молитва
2-я, иже во
святыхъ
отца нашего
Іоанна
Златоустаго:
Го́споди
Бо́же мой,
вѣмъ, я́ко
нѣсмь досто́инъ,
ниже́ дово́ленъ,
да подъ
кровъ вни́деши
хра́ма души́
моея́, зане́же
весь пусть и
па́лся есть,
и не и́маши
во мнѣ мѣ́ста
досто́йна, е́же
главу́
подклони́ти:
но я́коже съ
высоты́
насъ ра́ди
смири́лъ
еси́ Себе́,
смири́ся и
ны́нѣ смире́нію
моему́: и я́коже
воспрія́лъ
еси́ въ
верте́пѣ и
въ я́слѣхъ
безслове́сныхъ
возлещи́, си́це
воспріими́
и въ я́слѣхъ
безслове́сныя
моея́ души́,
во оскверне́нное
мое́ тѣ́ло
вни́ти. И я́коже
не неудосто́илъ
еси́ вни́ти,
и свечеря́ти
со грѣ́шники
въ дому́ Си́мона
прокаже́ннаго,
та́ко изво́ли
вни́ти и въ
домъ смире́нныя
моея́ души́,
прокаже́нныя
и грѣ́шныя: и
я́коже не
отри́нулъ
еси́ подо́бную
мнѣ блудни́цу,
и грѣ́шную,
прише́дшую
и прикосну́вшуюся
Тебѣ́, си́це
умилосе́рдися
и о мнѣ грѣ́шнѣмъ,
приходя́щемъ
и прикаса́ющемтися;
и я́коже не
возгнуша́лся
скве́рныхъ
ея́ усть и
нечи́стыхъ,
цѣлу́ющихъ
Тя, ниже́ мои́хъ
возгнуша́йся
скве́рншихъ
о́ныя устъ и
нечи́стшихъ,
ниже́ ме́рзкихъ
мои́хъ и
нечи́стыхъ
усте́нъ, и
скве́рнаго
и нечи́стѣйшаго
моего́ язы́ка.
Но да бу́детъ
ми угль
пресвята́го
Твоего́ Тѣ́ла
и честны́я
Кро́ве, во
освяще́ніе,
и просвѣще́ніе
и здра́віе
смире́ннѣй
мое́й души́
и тѣ́лу, во
облегче́ніе
тя́жестей
мно́гихъ
мои́хъ
согрѣше́ній,
въ соблюде́ніе
отъ вся́каго
діа́вольскаго
дѣ́йства, во
отгна́ніе и
возбране́ніе
зла́го
моего́ и
лука́ваго
обы́чая, во
умерщвле́ніе
страсте́й,
въ снабдѣ́ніе
за́повѣдей
Твои́хъ, въ
приложе́ніе
Боже́ственныя
Твоея́
благода́ти,
и Твоего́ Ца́рствія
присвое́ніе.
Не бо я́ко
презира́яй
прихожду́
къ Тебѣ́,
Христе́ Бо́же,
но я́ко
дерза́я на
неизрече́нную
Твою́ бла́гость,
и да не на
мно́зѣ
удаля́яйся
обще́нія
Твоего́, оть
мы́сленнаго
во́лка
звѣро-уловле́нъ
бу́ду. Тѣ́мже
молю́ся
Тебѣ́: я́ко
еди́нъ сый
Святъ, Влады́ко,
освяти́ мою́
ду́шу и тѣ́ло,
умъ и се́рдце,
чревеса́ и
утро́бы, и
всего́ мя
обнови́, и
вкорени́
страхъ Твой
во удесѣ́хъ
мои́хъ, и
освяще́ніе
Твое́
неотъе́млемо
отъ мене́
сотвори́: и
бу́ди ми
помо́щникъ
и засту́пникъ,
окормля́я
въ ми́рѣ
живо́ть мой,
сподобля́я
мя и одесну́ю
Тебе́
предстоя́нія
со святы́ми
Твои́ми,
моли́твами
и моле́ньми
Пречи́стыя
Твоея́ Ма́тере,
невеще́ственныхъ
Твои́хъ
служи́телей
и пречи́стыхъ
силъ, и
всѣхъ святы́хъ,
отъ вѣ́ка
Тебѣ́
благоугоди́вшихъ.
Ами́нь.
Молитва
3-я, Сѵмеона
Метафраста:
Еди́не
чи́стый и
нетлѣ́нный
Го́споди, за
неизрече́нную
ми́лость
человѣколю́бія,
на́ше все
воспріе́мый
смѣше́ніе,
отъ чи́стыхъ
и дѣ́вственныхъ
крове́й па́че
естества́
Ро́ждшія Тя,
Ду́ха Боже́ственнаго
наше́ствіемъ,
и благоволе́ніемъ
Отца́
присносу́щнаго,
Христе́
Іису́се,
прему́дросте
Бо́жія, и ми́ре,
и си́ло: Твои́мъ
воспрія́тіемъ
животворя́щая
и спаси́тельная
страда́нія
воспріе́мый,
крестъ, гво́здія,
копіе́,
смерть:
умертви́
моя́
душетле́нная
стра́сти
тѣле́сныя.
Погребе́ніемъ
Твои́мъ а́дова
плѣни́вый
ца́рствія,
погреби́
моя́ благи́ми
по́мыслы
лука́вая
совѣ́тованія,
и лука́вствія
ду́хи
разори́.
Тридне́внымъ
Твои́мъ и
живоно́снымъ
воскресе́ніемъ
па́дшаго
пра́отца
возста́вивый,
возста́ви
мя грѣхо́мъ
попо́лзшагося,
о́бразы мнѣ
покая́нія
предлага́я.
Пресла́внымъ
Твои́мъ
вознесе́ніемъ
плотско́е
обожи́вый
воспрія́тіе,
и сіе́ десны́мъ
Отца́ сѣдѣ́ніемъ
почты́й,
сподо́би мя
прича́стіемъ
святы́хъ
Твои́хъ Та́инъ,
десну́ю
часть спаса́емыхъ
получи́ти.
Сни́тіемъ
Утѣ́шителя
Твоего́ Ду́ха
сосу́ды
честны́
свяще́нныя
Твоя́ уче́ники
содѣ́лавый,
прія́телище
и мене́
покажи́
Того́ прише́ствія.
Хотя́й па́ки
пріити́
суди́ти
вселе́ннѣй
пра́вдою,
благоволи́
и мнѣ усрѣ́сти
Тя на о́блацѣхъ,
Судію́ и
Созда́теля
моего́, со
всѣ́ми
святы́ми
Твои́ми: да
безконе́чно
славосло́влю
и воспѣва́ю
Тя, со
безнача́льнымъ
Твои́мъ
Отце́мъ, и
Пресвяты́мъ
и благи́мъ и
животворя́щимъ
Твои́мъ Ду́хомъ,
ны́нѣ и при́сно,
и во вѣ́ки
вѣко́въ. Ами́нь.
Молитва
4-я,
Божественнаго
Дамаскина:
Влады́ко
Го́споди
Іису́се
Христе́, Бо́же
нашъ, еди́не
имѣ́яй
власть
человѣ́комъ
оставля́ти
грѣхи́, я́ко
благъ и
Человѣколю́бецъ
пре́зри моя
вся въ вѣ́дѣніи
и не въ вѣ́дѣніи
прегрѣше́нія:
и сподо́би
мя неосужде́нно
причасти́тися
Боже́ственныхъ,
и пресла́вныхъ,
и пречи́стыхъ,
и животворя́щихъ
Твои́хъ Та́инъ,
не въ тя́жесть,
ни въ му́ку,
ни въ
приложе́ніе
грѣхо́въ: но
во очище́ніе,
и освяще́ніе,
и обруче́ніе
бу́дущаго
живота́ и ца́рствія,
въ стѣ́ну и
по́мощь, и въ
возраже́ніе
сопроти́вныхъ,
во истребле́ніе
мно́гихъ
мои́хъ
согрѣше́ній.
Ты бо еси́
Богъ ми́лости,
и щедро́тъ, и
человѣколю́бія,
и Тебѣ́ сла́ву
возсыла́емъ,
со Отце́мъ, и
Святы́мъ Ду́хомъ,
ны́нѣ и при́сно,
и во вѣ́ки
вѣко́въ. Ами́нь.
Молитва
5-я, Великаго
Василія:
Вѣмъ,
Го́споди, я́ко
недосто́йнѣ
причаща́юся
пречи́стаго
Твоего́ Тѣ́ла
и честны́я
Твоея́ Кро́ве,
и пови́ненъ
есмь, и судъ
себѣ́ ямъ и
пію́, не
разсужда́я
Тѣ́ла и Кро́ве
Тебе́
Христа́ и Бо́га
моего́: но на
щедро́ты
Твоя́ дерза́я
прихожду́
къ Тебѣ́ ре́кшему:
яды́й Мою́
плоть, и пія́й
Мою́ кровь,
во Мнѣ
пребыва́еть,
и Азъ въ
немъ.
Умилосе́рдися
у́бо, Го́споди,
и не обличи́
мя грѣ́шнаго,
но сотвори́
со мно́ю по
ми́лости
Твое́й: и да
бу́дуть ми
свята́я сія́,
во исцѣле́ніе,
и очище́ніе,
и просвѣще́ніе,
и сохране́ніе,
и спасе́ніе,
и во освяще́ніе
души́ и тѣ́ла:
во отгна́ніе
вся́каго
мечта́нія, и
лука́ваго
дѣя́нія, и дѣ́йства
діа́вольскаго,
мы́сленнѣ
во удесѣ́хъ
мои́хъ дѣ́йствуемаго,
въ дерзнове́ніе
и лю́бовь я́же
къ Тебѣ́: во
исправле́ніе
житія́ и
утвержде́ніе,
въ возвраще́ніе
добродѣ́тели
и соверше́нства:
во исполне́ніе
за́повѣдей,
въ Ду́ха
Свята́го
обще́ніе, въ
напу́тіе
живота́ вѣ́чнаго,
во отвѣ́тъ
благопрія́тенъ
на стра́щнѣмъ
суди́щи
Твое́мъ: не
въ судъ, или́
во осужде́ніе.
Молитва
6-я, св.
Сѵмеона
Новаго
Богослова:
Отъ
скве́рныхъ
усте́нъ, оть
ме́рзкаго
се́рдца, отъ
нечи́стаго
язы́ка, отъ
души́
оскверне́ны,
пріими́
моле́ніе,
Христе́ мой,
и не пре́зри
мои́хъ, ни
слове́съ,
ниже́
образо́въ,
ниже́
безсту́дія.
Даждь ми
дерзнове́нно
глаго́лати,
я́же хощу́,
Христе́ мой,
па́че же и
научи́ мя,
что ми
подоба́етъ
твори́ти и
глаго́лати:
согрѣши́хъ
па́че
блудни́цы, я́же
увѣ́дѣ гдѣ
обита́еши,
мѵ́ро купи́вши,
пріи́де де́рзостнѣ
пома́зати
Твои́ но́зѣ,
Бо́га моего́,
Влады́ки и
Христа́
моего́.
Якоже о́ну
не отри́нулъ
еси́ прише́дшую
оть се́рдца,
ниже́ мене́
возгнуша́йся,
Сло́ве: Твои́
же ми пода́ждь
но́зѣ, и
держа́ти и
цѣлова́ти, и
струя́ми
сле́зными, я́ко
многоцѣ́ннымъ
мv́ромъ,
сія́ де́рзостно
пома́зати.
Омы́й мя
слеза́ми
мои́ми, очи́сти
мя и́ми, Сло́ве.
Оста́ви и
прегрѣше́нія
моя́, и проще́ніе
ми пода́ждь.
Вѣ́си золъ
мно́жество,
вѣ́си и стру́пы
моя́, и я́звы
зри́ши моя́,
но и вѣ́ру вѣ́си,
и произволе́ніе
зри́ши, и
воздыха́ніе
слы́шиши. Не
таи́тся
Тебѣ́, Бо́же
мой, Тво́рче
мой, Изба́вителю
мой, ниже́ ка́пля
сле́зная,
ниже́ ка́пли
часть нѣ́кая.
Несодѣ́ланное
мое́ ви́дѣсте
о́чи Твои́,
въ кни́зѣ же
Твое́й и еще́
несодѣ́янная
напи́сана
Тебѣ́ суть.
Виждь смире́ніе
мое́, виждь
трудъ мой
ели́къ, и
грѣхи́ вся
оста́ви ми,
Бо́же вся́ческихъ:
да чи́стымъ
се́рдцемъ,
притре́петною
мы́слію и
душе́ю
сокруше́нною
нескве́рныхъ
Твои́хъ
причащу́ся
и пресвяты́хъ
Та́инъ, и́миже
оживля́ется
и обожа́ется
всякъ яды́й
же и пія́й чи́стымъ
се́рдцемъ.
Ты бо реклъ
еси́, Влады́ко
мой: всякъ
яды́й Мою́
Плоть и пія́й
Мою́ Кровь,
во Мнѣ у́бо
сей пребыва́етъ,
въ не́мже и
Азъ есмь.
Истинно сло́во
вся́ко
Влады́ки и
Бо́га моего́:
боже́ственныхъ
бо причаща́яйся
и боготворя́щихъ
благодатей,
не у́бо есмь
еди́нъ, но съ
Тобо́ю,
Христе́ мой,
свѣ́томъ
трисо́лнечнымъ,
просвѣща́ющимъ
міръ. Да у́бо
не еди́нъ
пребу́ду
кромѣ́ Тебе́
Живода́вца,
дыха́нія
моего́,
живота́
моего́, ра́дованія
моего́,
спасе́нія мíру.
Сего́ ра́ди
къ Тебѣ́
приступи́хъ,
я́коже зри́ши,
со слеза́ми,
и душе́ю
сокруше́нною,
избавле́нія
мои́хъ
прегрѣше́ній
прошу́ прія́ти
ми, и Твои́хъ
живода́тельныхъ
и непоро́чныхъ
та́инствъ
причасти́тися
неосужде́нно,
да пребу́деши,
я́коже
реклъ еси́,
со мно́ю
треокая́ннымъ,
да не кромѣ́
обрѣ́тъ мя
Твоея́
благода́ти,
преле́стникъ
восхи́тить
мя льсти́внѣ,
и прельсти́въ
отведе́ть
боготворя́щихъ
Твои́хъ
слове́съ.
Сего́ ра́ди
къ Тебѣ́
припа́даю, и
те́плѣ
вопію́ Ти: я́коже
блу́днаго
прія́лъ еси́,
и блудни́цу
прише́дшую:
та́ко
пріими́ мя
блу́днаго и
скве́рнаго,
Ще́дре. Душе́ю
сокруше́нною,
ны́нѣ бо къ
Тебѣ́
приходя́,
вѣмъ, Спа́се,
я́ко ины́й, я́коже
азъ, не
прегрѣши́
Тебѣ́, ниже́
содѣ́я дѣя́нія,
я́же азъ
содѣ́яхъ. Но
сіе́ па́ки
вѣмъ, я́ко не
вели́чество
прегрѣше́ній,
ни грѣхо́въ
мно́жество
превосхо́дить
Бо́га моего́
мно́гое
долготерпѣ́ніе,
и
человѣколю́біе
кра́йнее: но
ми́лостію
состра́стія
те́плѣ ка́ющыяся,
и чи́стиши, и
свѣ́тлиши, и
свѣ́та
твори́ши
прича́стники,
о́бщники
Божества́
Твоего́
содѣ́ловаяй
незави́стно,
и стра́нное
и Ангеломъ,
и человѣ́ческимъ
мы́слемъ,
бесѣ́дуеши
имъ мно́гажды,
я́коже
друго́мъ
Твои́мъ и́стиннымъ.
Сія́ де́рзостна
творя́ть мя,
сія́ вперя́ють
мя, Христе́
мой. И дерза́я
Твои́мъ
бога́тымъ
къ намъ
благодѣя́ніемъ,
ра́дуяся
вку́пѣ и
трепе́ща,
огне́ви
причаща́юся,
трава́ сый, и
стра́нно чу́до,
ороша́емь
неопа́льно,
я́коже у́бо
купина́ дре́вле
неопа́льнѣ
горя́щи. Ны́нѣ
благода́рною
мы́слію,
благода́рнымъ
же се́рдцемъ,
благода́рными
удесы́ мои́ми,
души́ и тѣ́ла
моего́,
покланя́юся
и велича́ю, и
славосло́влю
Тя, Бо́же мой,
я́ко
благослове́нна
су́ща, ны́нѣ
же и во вѣ́ки.
Молитва
7-я, иная
Златоустаго:
Бо́же,
осла́би,
оста́ви,
прости́ ми
согрѣше́нія
моя́, ели́ка
Ти согрѣши́хъ,
а́ще сло́вомъ,
а́ще дѣ́ломъ,
а́ще
помышле́ніемъ,
во́лею или́
нево́лею, ра́зумомъ
или́ неразу́міемъ,
вся ми
прости́ я́ко
благъ и
Человѣколю́бецъ.
И моли́твами
Пречи́стыя
Твоея́ Ма́тере,
у́мныхъ
Твои́хъ
служи́телей
и святы́хъ
силъ, и
всѣхъ святы́хъ,
оть вѣ́ка
Тебѣ́
благоугоди́вшихъ,
неосужде́нно
благоволи́
прія́ти ми
свято́е и
пречи́стое
Твое́ Тѣ́ло
и честну́ю
Кровь, во
исцѣле́ніе
души́ же и тѣ́ла,
и во очище́ніе
лука́выхъ
мои́хъ
помышле́ній.
Яко Твое́
есть ца́рство
и си́ла и сла́ва,
со Отце́мъ и
Святы́мъ Ду́хомъ,
ны́нѣ и при́сно,
и во вѣ́ки
вѣко́въ. Ами́нь.
Молитва
8-я, тогожде:
Нѣсмь
дово́ленъ,
Влады́ко Го́споди,
да вни́деши
подъ кровъ
души́ моея́:
но поне́же
хо́щеши Ты, я́ко
Человѣколю́бецъ
жи́ти во мнѣ,
дерза́я
приступа́ю:
повелѣва́еши,
да отве́рзу
две́ри, я́же
Ты еди́нъ
созда́лъ
еси́, и вни́деши
со
человѣколю́біемъ
я́коже еси́,
вни́деши и
просвѣща́еши
помраче́нный
мой по́мыслъ.
Вѣ́рую, я́ко
сіе́
сотвори́ши:
не бо блудни́цу,
со слеза́ми
прише́дшую
къ Тебѣ́,
отгна́лъ
еси́: ниже́
мытаря́
отве́рглъ
еси́ пока́явшася:
ниже́ разбо́йника,
позна́вша
ца́рство
Твое́, отгна́лъ
еси́: ниже́
гони́теля
пока́явшася
оста́вилъ
еси́, е́же бѣ:
но отъ покая́нія
Тебѣ́ прише́дшыя
вся, въ лицѣ́
Твои́хъ
друго́въ
вчини́лъ
еси́, еди́нъ
сый
благослове́нный
всегда́, ны́нѣ
и въ безконе́чныя
вѣ́ки. Ами́нь.
Молитва
9-я, тогожде:
Го́споди
Іису́се
Христе́, Бо́же
мой, осла́би,
оста́ви, очи́сти,
и прости́ ми,
грѣ́шному, и
непотре́бному,
и недосто́йному
рабу́
Твоему́
прегрѣше́нія,
и согрѣше́нія,
и грѣхопаде́нія
моя́, ели́ка
Ти отъ ю́ности
моея́, да́же
до настоя́щаго
дне и часа́
согрѣши́хъ:
а́ще въ ра́зумѣ
и въ неразу́міи,
а́ще въ
словесѣ́хъ
или́ дѣ́лѣхъ,
или́
помышле́ніихъ
и мы́слехъ, и
начина́ніихъ,
и всѣхъ мои́хъ
чу́вствахъ.
И моли́твами
безсѣ́менно
ро́ждшія Тя,
Пречи́стыя
и Приснодѣ́вы
Марíи, Ма́тере
Твоея́, еди́ныя
непосты́дныя
наде́жды и
предста́тельства
и спасе́нія
моего́,
сподо́би мя
неосужде́нно
причасти́тися
пречи́стыхъ,
безсме́ртныхъ,
животворя́щихъ
и стра́шныхъ
Твои́хъ Та́инствъ,
во оставле́ніе
грѣхо́въ и
въ жизнь вѣ́чную:
во освяще́ніе,
и просвѣще́ніе,
крѣ́пость,
исцѣле́ніе,
и здра́віе
души́ же и тѣ́ла,
и въ
потребле́ніе
и
всесоверше́нное
погубле́ніе
лука́выхъ
мои́хъ
помысло́въ,
и помышле́ній,
и предпрія́тій,
и нощны́хъ
мечта́ній,
те́мныхъ и
лука́выхъ
духо́въ: я́ко
Твое́ есть
ца́рство, и
си́ла, и сла́ва,
и честь, и
поклоне́ніе,
со Отце́мъ и
Святы́мъ
Твои́мъ Ду́хомъ,
ны́нѣ и при́сно,
и во вѣ́ки
вѣко́въ. Ами́нь.
Молитва
10-я, иная
Іоанна
Дамаскина:
Предъ две́рьми
хра́ма
Твоего́
предстою́, и
лю́тыхъ
помышле́ній
не отступа́ю:
но Ты,
Христе́ Бо́же,
мытаря́
оправди́вый,
и Ханане́ю
поми́ловавый,
и разбо́йнику
рая́ две́ри
отве́рзый,
отве́рзи ми
утро́бы
человѣколю́бія
Твоего́, и
пріими́ мя
приходя́ща
и прикаса́ющася
Тебѣ́, я́ко
блудни́цу, и
кровоточи́вую:
о́ва у́бо
кра́я ри́зы
Твоея́
косну́вшися,
удо́бь
исцѣле́ніе
прія́тъ: о́ва
же пречи́стѣи
Твои́ но́зѣ
удержа́вши,
разрѣше́ніе
грѣхо́въ
понесе́. Азъ
же, окая́нный,
все Твое́ Тѣ́ло
дерза́я
воспрія́ти,
да не опале́нъ
бу́ду: но
пріими́ мя, я́коже
о́ныя, и
просвѣти́
моя́ душе́вныя
чу́вства,
попаля́я
моя́ грѣхо́вныя
ви́ны, моли́твами
безсѣ́менно
Ро́ждшія Тя,
и небе́сныхъ
силъ; я́ко
благослове́нъ
еси́ во вѣ́ки
вѣко́въ. Ами́нь.
Молитва
иная
Златоустаго:
Вѣ́рую,
Го́споди, и
исповѣ́дую,
я́ко Ты еси́
вои́стинну
Христо́съ,
Сынъ Бо́га
жива́го,
прише́дый
въ міръ грѣ́шныя
спасти́, оть
ни́хже пе́рвый
есмь азъ.
Еще́ вѣ́рую,
я́ко сіе́
есть са́мое
пречи́стое
Тѣ́ло Твое́,
и сія́ есть
са́мая
честна́я
Кровь Твоя́.
Молю́ся у́бо
Тебѣ́: поми́луй
мя, и прости́
ми прегрѣше́нія
моя́, во́льная
и нево́льная,
я́же сло́вомъ,
я́же дѣ́ломъ,
я́же вѣ́дѣніемъ
и невѣ́дѣніемъ,
и сподо́би
мя неосужде́нно
причасти́тися
пречи́стыхъ
Твои́хъ Та́инствъ,
во оставле́ніе
грѣхо́въ, и
въ жизнь вѣ́чную.
Ами́нь.
Приходяй
же
причаститися,
глаголи въ
себѣ
настоящыя
стихи
Метафраста:
Се
приступа́ю
къ Боже́ственному
Причаще́нію.
Содѣ́телю,
да не опали́ши
мя пріобще́ніемъ:
Огнь
бо еси́,
недосто́йныя
попаля́я.
Но
у́бо очи́сти
мя отъ вся́кія
скве́рны.
Таже
паки
глаголи:
Ве́чери
Твоея́ та́йныя
днесь, Сы́не
Бо́жій,
прича́стника
мя пріими́:
не бо враго́мъ
Твои́мъ та́йну
повѣ́мъ, ни
лобза́нія
Ти дамъ, я́ко
Iу́да, но я́ко
разбо́йникъ,
исповѣ́дую
Тя: помяни́
мя, Госпо́ди,
во Ца́рствіи
Твое́мъ.
Паки
стихи сія:
Боготворя́щую
Кровь
ужасни́ся,
человѣ́че,
зря:
Огнь
бо есть,
недосто́йныя
попаля́яй.
Боже́ственное
Тѣ́ло и
обожа́етъ
мя и пита́етъ.
Обожа́етъ
духъ, умъ же
пита́етъ
стра́нно.
Таже
тропари:
Услади́лъ
мя еси́ любо́вію,
Христе́, и
измѣни́лъ
мя еси́ Боже́ственнымъ
Твои́мъ
раче́ніемъ:
но попали́
огне́мъ
невеще́ственнымъ
грѣхи́ моя́,
и насы́титися
е́же въ Тебѣ́,
наслажде́нія
сподо́би: да
лику́я
возвелича́ю,
Бла́же, два
прише́ствія
Твоя́.
Во
свѣ́тлостехъ
святы́хъ
Твои́хъ ка́ко
вни́ду
недосто́йный?
Аще бо
дерзну́
совни́ти въ
черто́гъ,
оде́жда мя
облича́етъ,
я́ко нѣсть
бра́чна, и
свя́занъ
изве́рженъ
бу́ду отъ
Ангеловъ.
Очи́сти, Го́споди,
скве́рну
души́ моея́,
и спаси́ мя,
я́ко
Человѣколю́бецъ.
Таже
молитву:
Влады́ко
Человѣколю́бче,
Го́споди
Іису́се
Христе́, Бо́же
мой, да не въ
судъ ми бу́дуть
свята́я сія́,
за е́же
недосто́йну
ми бы́ти: но
во очище́ніе
и освяще́ніе
души́ же и тѣ́ла,
и во обруче́ніе
бу́дущія жи́зни
и ца́рствія.
Мнѣ же, е́же
прилѣпля́тися
Бо́гу, бла́го
есть, полага́ти
во Го́сподѣ
упова́ніе
спасе́нія
моего́.
И
паки:
Ве́чери
Твоея́ та́йныя
днесь, Сы́не
Бо́жій,
прича́стника
мя пріими́:
не бо враго́мъ
Твои́мъ та́йну
повѣ́мъ, ни
лобза́нія
Ти дамъ, я́ко
Iу́да, но я́ко
разбо́йникъ,
исповѣ́дую
Тя: помяни́
мя, Госпо́ди,
во Ца́рствіи
Твое́мъ.
